Bua puo ya gaeno. Ke tshwanelo ya gago.
Tirelo ya Boranoledi ka Mogala ya Aforika Borwa (TBMAB/TISSA) e simolotswe ke Lefapha la Botsweretshi le Setso go rotloetsa tiriso ya dipuo tse di latelang tsa semmuso: (Sezulu, Sethosa, Setebele, Seswati, Sesotho, Setswana, Sepedi, Setsonga, Sevenda, Seesimane le Aforikanse).
Ke mofuta ofe wa tirelo o o tlamelwang?
TISSA e tlamela tirelo ya go ranolela ka mogala e e tlileng go kgontsha tlhaeletsano magareng ga setšhaba le puso ka go dirisa dipuo tsa semmuso tsa tlholego go fitlhelela ditirelo tsa puso.
Ke ka ntlha ya eng tirelo e e tlamelwa?
Ka TISSA, puso e diragatsa taolelo ya Molaotheo ka go tsaya dikgato tse di maleba le tse di bonagalang tsa go tlhabolola le go rotloetsa dipuo tsa semmuso tsa tlholego.
A setšhaba se ka kopa ditirelo tsa puso ka puo ya bone ya ga mme?
Ee, fela fa puo ya ga mme e le nngwe ya dipuo tsa semmuso.
A puo ya diatla e akareditswe?
Ee, disusu di akareditswe mo tirelong ya TISSA. Di tlile go kgona go fitlhelela ditirelo tsa puso, jaaka batho ba ba utlwang, kwa mafelong a a kwa Cape Town, Johannesburg, Durban le Polokwane.
Tirelo ya TISSA e dira jang?
Fa leloko la setšhaba le modiredipuso ba sa kgone go utlwana ka dipuo, modiredipuso a ka leletsa setheo sa thuso sa TISSA.
Kwa setheong sa thuso, mothusi o tlile go gokaganya modiredipuso le leloko la setšhaba le moranoledi yo o kgonang go bua dipuo ka bobedi.
Modiredipuso o tlile go nna le mogala wa didirisiwa tse pedi gore ena le leloko la setšhaba ba tle ba kgone go reetsa moranoledi.
Moranoledi o tlile jaanong go ba ranolela. Se se ka tsaya metsotswana e se kae.
Ke tlile go itse jang gore lefapha la puso le tlamela ditirelo tsa boranoledi?
Matshwao a kitsiso kwa dikantorong tsa puso a tlile go bontsha go nna teng ga tirelo ya TISSA.
Fa kantoro ya Puso e sa bontshe letshwao la TISSA, a ke sa ntsane nka kopa tirelo ya boranoledi?
Nyaa, tirelo e teng fela kwa mafelong a a bontshang letshwao la TISSA. Le fa go ntse jalo, mafelo a a farologaneng a tlile go akarediwa mo nakong e e tlang.
TISSA e tlile go ntswela mosola jang?
E tlile go nna le seabe se segolo mo tlhabololong ya ditshwanelo tsa gago tsa puo, gape le ditshwanelo tsa botho mo Aforika Borwa.
Gape e tlile go nna le seabe se se botlhokwa mo thotloetsong le tiriso ya dipuo tsa semmuso tsa tlholego le puo ya diatla.
O tlile go kgona go fitlhelela ditirelo tsa puso ka puo ya gaeno
Go bona tshedimosetso go ya pele ikgolaganye le Golola Consultancy
